Mmano a mmano ca passa ‘o tiempo nce accurggìmmo ca ‘sta lengua nosta ‘a truvàmmo pe ttutte parte: ‘ncopp’ ê ‘nzegne d’ ‘e rreclamme, dint’ a ll’internette, ‘ncopp’ ê ffrase amirose, ‘ncopp’ê bbuatte ‘e ciuccùlata…ecc., ecc. Ma disgrazziatamente pure ‘e ccriature noste ‘a parlano ‘na fetenzia e ‘a scrìveno peggio..
Avìmm’ ‘a dicere ‘nfatte ca quase sempe ‘sti ffrase so’sbagliate: nun se tratta ‘e lengua napulitana e ‘o ssuperchio è cca tuttie ‘sti ffessarie vèneno assaje vote pure ‘a fora, ‘a mano ‘e furastiére…
Picciò ll’Accademmia Napulitana sta facenno ‘na fatica gross’assaje pe ccercà allimmeno ‘e scancellà tutte ‘sti ffessàrie ca se védeno pe ttutte parte pecché overo nun se ne po’ cchiù!
Senza cuntà ca tutte ‘sti mmercanzie ca vulésseno êsse ” a llengua nosta” p’ êss’ accàttate dê ssacche noste, nun vèneno dâ terra nosta!
Mo,si ‘na fetenzia ‘e Napulitano s’ ‘a vénneno pe Nnapulitano, senza cuntà tutt’ ‘e dducezze ca tenìmmo nuje …allora ce avìmm’ ‘a dà ‘na mossa pe nu’ffà rucilià ‘sta lengua nosta dint’â fossa!
Massimiliano Verde
Prèsidente ‘e ll’Accademmia Napulitana