NU’BBENITE A NNAPULE (NON VENITE A NAPOLI).

NU’ BBENITE A NNAPULE. MAJE

Nu’bbenite a Nnapule, lassàte stà. V’ ‘o ddico c’ ‘o core mmano, cu ttutta sincerità.
Nu’bbenite pe nnisciuna raggiona né mmutivo.
Si ve vène ‘o ggenio, facitavéllo passà. Ve nguajarrà ‘a vita.

‘A vita ve ntussecarrà.
Pecché adoppo passato ‘nu poco ‘e tiempo a Nnapule nun fusseve cchiù vvuje. Niente fosse comm’ a pprimma.
Ve paresse ca ‘o munno comme nfino a ogge ll’avite cunusciuto accussí nun fosse maje apparuto.
Ca tutto fosse cchiù ffacile, ca tutto jesse sciulianno quietamente e ssenza prubbleme.

Pecché chesto vuje vulite overamente…chesto è cchello ca vuje penzate ch’è gghiusto, si ‘e ccose vanno senza probbleme e ccu ffacirtà allora va tutto bbuono: chesta è ‘a verità….

Nu’bbenite a Nnapule. MAJE….


Pecché â matina ve scetasseve e vve truvasseve ‘e fronte, nu mare ca ve fa ‘o pizz’ a rriso, nu sole ca ve vase, ‘na muntagna chiammata Vesuvio ca v’abbraccia e ‘na città ca campa ‘e cose semprice e vverace.
Pecché ve truvasseve abbarruccate mmiez’â via a gguardà cchiesie, munumente, statue, storia, chiazze uttucentesche a cquale ca fosse ‘a staggiona e ppe cchesto v’addunnasseve d ‘ ‘o ppassà d’ ‘o tiempo e cche l’arbere ‘a russe e ggialle so’mmece rummaste senza foglie e ddoppo ‘nu poco so’asciute ‘e jette e ca c’ ‘o ppassà d’ ‘e juorne ce stann’âucelluzze ca cantàno a ffronne.

Pecché avisseve addeventà n’acrobbata d’ ‘o tiempo, truvà ‘na cadenza ca manco vuje sapisseve ‘e tené.
Pecché capisseve chi ve vo overamente bbene e vve st’appriess’ e cchi mmece s’arrenne ô primmo prubblema d’ ‘a vita stessa.

Pecché quanno avisseve ‘a chiagnere, ‘e llacreme voste nunn’ avesser’ ‘o canzo e tuccà nterra pecché truvasseve sempe a uno ca ‘e rippe o ‘e rappe ve stesse a ssentì. Pecché si avisseve ‘a murí ce stesse sempe coccheduno ca parlasse e ss’arricurdasse ‘e vuje….

Nu’bbenite a Nnapule. MAJE.

Pecché si site overamente aumane Napule ve mpararrà.Ve mpararrà siconno chello ca pe vvuje è cchiù ddoce e ssarvatico .
Cu ll’ammore.
Ve mpararrà âmmore e bbasta, senza nisciuna cundizziona.
Chillo ca nun chiede niente arrete. A nu’ttené bbarrere,a essere comme site.
Ve mpararrà â libertà ca tenite adinto.
Ve mpararrà a nu’vve defennere maje ‘a chi vulìte bbene.
A nu’ ttené asteo, a pperdunà sempe, a ddemustrà ammore ogn’accasione.
Ve mpararrà a ssentì e ddà ‘o bbene a ll’ate, a ttené caro ‘e chi vulite bbene
A gguardà ‘o munno attuorno a vvuje e ccapì cu ‘na cammenata, ‘na mossa,  ‘n’affessecchiata, ‘nu saluto ‘e n’estraneo, chello ca nun va …..
Ve mpararrà a nnun’ ausà ‘e pparole. Ve mpararrà a êss’uneste.

Nu’bbenite a Nnapule. MAJE.

Pecché quanno po v’avesse mparate…vuje cercasseve ‘e stessi ccose dô paese vuosto….e nnun’ arresecasseve a ccapì pecché Napule ve ll’ ‘a saputo dà e mmece ca tant’ati ccittà no, addó ca, cca mmece âte truvate tanta cristiane cu ttanta niurone e nu core gruoss’ assaje
Nun arresecasseve a ttruvà ‘a stessa lialtà ‘a ró site venute e cchi avite avuto bbecino nfino a mmo. E cchi diceva ‘e ve vulé bbene.

Nu’bbenite a Nnapule.MAJE.

Pecché addiventasseve nu cristiano spierto, ‘e chille ca sempe ce provano a ccrérere a cciert’ati cristiane, ma abbuscano sempe.

MASSIMILIANO VERDE

Presidente ACCADEMIA NAPOLETANA

Precedente NOTA DELLA FEDERAZIONE ASSOCIAZIONI CAMPANIA U.S.A. Successivo NEAPOLITAN LANGUAGE, (NAPULITANO), AN ACADEMY FOR A WORLD HERITAGE